Қазақстан мұсылмандары діни басқармасының төрағасы, Бас мүфти Наурызбай қажы Тағанұлы Астана қаласындағы «Әзірет Сұлтан» мешітінде өткен «Имани жаз – 2026» жазғы сауат ашу курсының салтанатты ашылу рәсіміне қатысты.

Салтанатты жиынға Астана қаласының және «Әзірет Сұлтан» мешітінің Бас имамы Нұрбек Әуесханұлы, мешіттің дін қызметкерлері, ұстаздар, ата-аналар және курсқа қабылданған 10–15 жас аралығындағы шәкірттер қатысты.

Іс-шара барысында Бас мүфти жас шәкірттерге ақ батасын беріп, жазғы демалысты тиімді пайдаланып, білім мен тәрбиені қатар меңгерудің маңыздылығына тоқталды.

«Жазғы демалыс – әр баланың рухани һәм танымдық тұрғыдан дамуына берілген мүмкіндік. Осы уақытты пайдалы өткізіп, білім алып, көркем мінез бен ізгі қасиеттерді бойға сіңіру – болашаққа салынған берік негіз», – деді Бас мүфти.

Айта кетейік, «Имани жаз – 2026» жазғы сауат ашу курсы бүгіннен бастап еліміздің барлық өңірлеріндегі мешіттерде өтуге. Аталған курс балалардың діни сауатын арттырумен қатар, ұлттық тәрбие мен адамгершілік құндылықтарды қалыптастыруға бағытталған рухани-танымдық жоба.

Жиырма күнге жоспарланған курс барысында шәкірттерге Құран әліппесі, имандылық негіздері, көркем мінез бен әдеп қағидалары оқытылады.

Сонымен қатар бағдарлама аясында қазақ халқының салт-дәстүрлері, үлкенге құрмет, кішіге ізет, отансүйгіштік пен ұлттық құндылықтарды дәріптеуге арналған арнайы тәрбие сағаттары өткізіледі. Бұл арқылы жас ұрпақтың бойына дін мен дәстүр сабақтастығын сіңіру көзделген.