Сауд Арабиясы Корольдігінің Жидда қаласында VI Халықаралық қажылық конференциясы мен көрмесі өтуде. 

Халықаралық жиынға Қазақстан мұсылмандары діни басқармасының Төрағасы Бас мүфти Наурызбай қажы Тағанұлы бастаған делегация қатысып жатыр.

Сауд Арабиясы Корольдігінің Қажылық және ұмра министрлігі ұйымдастырған шараға әлемнің түкпір-түкпірінен қажылық саласына жауапты мемлекеттік органдардың өкілдері мен қажылық миссияларының басшылары жиналды.

Конференция аясында Бас мүфти бастаған делегация өзге елдердің қажылық миссиялары басшыларымен бірге Мекке аймағы әмірінің орынбасары, ханзада Сауд ибн Мишғал ибн Абдулазиз Әл Саудпен өткен кездесуге қатысты.

Кездесуде қажылық саласындағы ынтымақтастық пен мұсылман елдері арасындағы рухани байланыстарды дамыту мәселелері сөз болды.