Балаларға базарлық! Маңғыстау облысында Қазақстан мұсылмандары діни басқармасы «Зекет және қайырымдылық» қорының ұйымдастыруымен игі іс-шара ұйымдастырылды. 

Облыстың бас имамы Әнуар Ізімбайұлының бастауымен бір топ дін қызметкері өңірдегі денсаулық сақтау басқармасына қарасты «облыстық мамандандырылған балалар үйінде» тәрбиеленіп жатқан бүлдіршіндерге барып, қайырымдылық көрсетті.

Игі шара аясында балаларға аяқ киім, жеміс-жидектер мен тәттілер табысталды. Мақсат – бүлдіршіндерге қуаныш сыйлап, олардың көңілдеріне жылулық ұялату.

Ізгілікке бағытталған шара барысында бас имам Әнуар Ізімбайұлы балдырғандарға ақ тілегін арнап, ізгі ниетін білдірді.Сондай-ақ болашағы жарқын болып, бақытты ғұмыр кешулеріне дұға жасады.

Әрбір бала бақытты балалық шаққа, мейірім мен қамқорлыққа лайық. Осындай қайырымдылық шаралары қоғамдағы жанашырлық пен ізгілікті нығайтып, балаларға үміт пен қуаныш сыйлайды.