Мұндай сұрақтың қойылуы заңды құбылыс. Діни басқарма бұған дейін «Зекет» қорына жинақталған қаржы сомасын өзінің ресми сайтында (www.muftyat.kz), төл басылымдарында («Иман» журналы, «Ислам және өркениет» газеті), өзге де мерзімді баспасөз бетттеріне жариялады. 2013 жылдың қаңтар мен қыркүйек айлары аралығында дін жанашырлары мен кәсіпкерлердің берген зекеті қайда, кімге, неге жұмсалғаны туралы мағлұматты дүйім жұртты хабардар етіп отырмыз. «Зекеттің» есеп-қисабы жайлы мәлімет беріп тұруға бекідік. Өйткені, Бас мүфти мүфтият жұмысының мөлдірлігі мен ашықтығына баса назар аударуда.

Ержан қажы Малғажыұлы Бас мүфти лауазымына тағайындалғаннан кейін араға бірер апта салып, «Зекет» қорының аймақтағы өкілдерін қабылдады. Сонда Ержан қажы Малғажыұлы қордың жұмысын жетілдіру жайлы қадау-қадау мәселе көтерді. Бас мүфти ең бастысы қаржының қайда жұмсалып жатқанын жұртымыз, жамағатымыз білуі тиіс екенін қадап айтты.

«Бізге бәрінен бұрын халықтың сенімі қымбат. Сенім қалыптасқан кезде ғана діннің жанашырлары қайырымды шараларға үлкен үлестерін қосатын болады. Сенім сейілген сәтте адамның жүрегіне күмән ұялайды. Сондықтан күмән болмау үшін ең алдымен жұмысымызға ашықтық қажет. Ашықтық бізді алысқа жетелейді», – деді Бас мүфти.

2013 жылдың 1 қаңтарына дейін қорға 52 682 143 (елу екі миллион алты жүз сексен екі мың бір жүз қырық үш) теңге жинақталғанын жаздық. Ал осы жылдың қаңтар мен қыркүйек айларында бес парыздың бірін орындауға ниет білдірген бауырларымыздан 33 705 557 (отыз үш миллион жеті жүз бес мың бес жүз елу жеті) теңгенің зекеті берілді.

Сонымен бұл миллиондар қайда кетіп жатыр дейсіз ғой? Ендеше, назар аударыңыз: еліміз бойынша жиналған қаржы қордың Жарғысы бойынша өзін-өзі қаражатпен қамтамасыз ете алмайтын 155 ауыл имамдарына 20-30 мың, 5 Зекет қорының өкіліне 40 мың теңге жалақы төленуде.

Облыстан түскен зекет сол өңірдегі имамдардың һәм тұрмысы төмен отбасылардың игілігіне жұмсалып жатыр. 9 айда имам-молдаларға берілген жалақы 29 144 639 (жиырма тоғыз миллион жүз қырық төрт мың алты жүз отыз тоғыз) теңгеге жетті. Бұдан бөлек «Зекет» қорының ұйымдастыруымен жаңа оқу жылы қарсаңында көпбалалы отбасылар мен тұрмысы төмен жандарға, жетімдерге республикалық қайырымдылық акциялары өткізілді. Оқуға қажетті құрал-жабдықтар тегін таратылды. Бір ғана мысал: Алматы қаласында 400-ге жуық балаға (әкімшіліктен берілген тізім бойынша) киім-кешек, сөмке, т.б. оқу құралдары үлестірілді. Оған қор есебінен 347 500 теңге бөлінді.

Қай өңірден қанша қаржы жиналды? Ол қайда, кімдерге жұмсалды? Кестеге көз жүгіртсеңіз болғаны. Жауабы дайын.

Ағабек ҚОНАРБАЙҰЛЫ,
ҚМДБ баспасөз хатшысы  
muftyat.kz