ҚМДБ Республикалық ақпараттық насихат тобының мүшесі, Астана қаласы «Әзірет Сұлтан» мешітінің наиб имамы Темірлан Дарханұлы Солтүстік Қазақстан облысына іссапармен барды.

Темірлан Дарханұлының өңірге сапары «Қызылжар» орталық мешітінен басталды. Жамағатқа жайылған дастархан басында ол «Алла елшісінің тақуалығы мен қарапайым өмір сүру өнегесі» тақырыбында уағыз-насихат айтты. Сонымен қатар, РАНТ мүшесі құптан намазы алдында қала, аудан, ауылдан жиналған ағайынға «Ислам бауырмашылық пен бірлікке үндейді» тақырыбы төңірегінде уағыз жүргізді. 

Сапардың екінші күні Темірлан Дарханұлы «Qyzyljar» телеарнасының «Руханият» бағдарламасына сұхбат берді. Онда «Мұсылман қарғыс айтпайды» тақырыбы арқау болды. Сондай-ақ, қала, аудан бас имамдарының біліктілігін арттыру мақсатында «Ислам және дәстүр құндылығы» тақырыбында семинар өткізді.

Білікті РАНТ мүшесіне Қызылжар өңірінің бас имамы Хамзат Қажымұратұлы өкілдік және жамағат атынан алғыс білдіріп, қызметіне табыс пен береке тіледі.