Қасиетті Мәуліт айының құрметіне орай ҚМДБ-ның Ақтөбе облыстық өкілдігіне қарасты облыс, қала, аудан мешіттерінің имамдары мен жамағаты жұма намаздан кейін әлемге рақым етіп жіберілген адамзаттың асылы Алла елшісіне (Алланың оған салауаты мен сәлемі болсын) салауаттар жолдап, мәуліт жырын оқыды.

Жамағатқа есігін айқара ашқан құлшылық ордасын Пайғамбарымызға деген сағыныштан туындаған салауат кернеп, Мәуліт мерекесінің мәртебесі асқақтай түсті.

Екі дүние сардарының әрбір әрекеті мен сөзінен рухани нәр алып, пайғамбарымызды (оған Алланың салауаты мен сәлемі болсын) шынайы жақсы көрудің қаншалықты маңызды екендігі де көркем түрде жеткізілді.

Мәуліт жырынан соң қасиетті Құран аяттары оқылып, ардақты Алла Елшісіне (Алланың оған салауаты мен сәлемі болсын), оның отбасына және барша марқұмдарға сауабы бағышталды. Елдің амандығы мен жұртымыздың тыныштығы үшін дұға жасалды.