Жамбыл облыстық «Һибатулла Тарази» мешітінде ҚМДБ «QAMQOR-SHARAPAT» салттық қызмет көрсету орталығының қызметін цифрландыру жұмыстары бойынша өңірлік семинар өтті.

Шараға «QAMQOR-SHARAPAT» орталығының директоры Мейрамбек Қабылбекұлы, «Sharapat Digital» ЖШС директоры Еркін Тойжанов, Жамбыл облысы бас имамының уақытша міндетін атқарушы Ғалымбек Жапек,  Дін істері басқармасының бас маманы Самғат Мутанов қатысып, баяндама жасады.

Басқосуда дамыған заманауи мемлекеттер сияқты зиярат салуда жарыспай, бір ізділікке түсіру, зияраттарды цифрландыру және оның мақсаты сөз болып, түсіндіріліп өтті.

«Біз зират үшін салық салатын мекеме емеспіз, біздің мақсатымыз - тек жерлеу, зиярат қою мәселесін дінге сай жүргізу, зиярат салуда жарысуды тоқтату, қайта халықтың қолданысын жеңілдету», - деп атап өтті «QAMQOR-SHARAPAT» орталығының директоры Мейрамбек Қабылбекұлы.

«Зиратты цифрландыру дегенді естігенде кейбір кісілер түсінбей, байбалам салуы мүмкін. Алайда ол барлық дамыған мемлекеттерде бар дүние. Біздің елімізде Астана қаласында жасалды, қазіргі уақытта Түркістан мен Шымкент қаласы цифрландырылуда. Ендігі кезек Тараз қаласына да келіп жетті. Бұл мақсатта jerleu.kz платформасы мен мобильді қосымшасы іске қосылған. Мәселен, Таразда 30-дан астам мазар бар. Бағдарлама туысын зиярат етіп баруға көмекші, марқұмның қай зияратта жатқанын білуге, табуға арналған құрал. Цифровизация барлық салада іске қосылған. Бұл жоспарды іске асыру үшін мемлекеттің қолдауымен, рұқсатымен аэрофотосъемка жасалуда.  Бағдарлама арқылы марқұмның қайтыс болғаны туралы анықтама алу жеңілдейді», - деді бағдарламаны түсіндіріп өткен Еркін Тойжанов. 

Ардагерлер алқасы, имамдар кезекпе кезек жаңа жобаға қатысты өз сұрақтарын қойып, халық арасындағы көкейкесті мәселелерді жеткізіп нақты жауаптар алды. Ғалымбек Жапек ақсақалдардың сұрақтарына жауап беріп, Елордадан келген мамандар қосымшаның сәуір айында App Store мен Play Market-те қол жетімді болатынын жеткізді.

Жиынға Дін істері басқармасының мамандары, «Көне Тараз ескерткіштері» ұйымы, Мәдениет және архив, құжаттама басқармасы, облыстық Ардагерлер алқасы, Тараз шаһарының имамдары, христиан дінінің өкілдері және БАҚ қызметкерлері қатысты.