Мүбәрак Мәуліт айы басталғалы бері елімізде, жалпы мұсылмандықты ұстанатын мемлекеттерде Алланың сүйікті құлы, ақырғы елшісі әрі пайғамбары болған Мұхаммед Мұстафаға (оған Алланың салауаты мен сәлемі болсын) арнап арнайы Мәуліт дұғасы оқылып, түрлі игі іс-шаралар атқарылып жатыр.

Мұндай игі шара Жамбыл облысында да болып, облыстық орталық «Һибатулла Тарази» мешітінде ардақты Пайғамбарымыздың (оған Алланың салауаты мен сәлемі болсын) құрметіне арнап мәуліт оқылды.

Жамбыл облысының бас имамы Бейбіт Мырзагелдиев бастаған қарилар Қасымжан Бектаев, Әлімұхаммед Егізбаев, Иманәлі Бейбітұлы ақыретте мұсылмандардың шапағатшысы болатын Пайғамбарымызға (оған Алланың салауаты мен сәлемі болсын) арнап, салауат, мадақ жырын, Мәуліт дұғасын оқыды. Сондай-ақ мешіт ауласында фуршет дастарқаны жайлып, жұмаға келген халық құрмадан, тәттілер мен тәтті нандардан ауыз тиді.