Тараз қаласындағы «Һибатулла Тарази медресе» колледжінің шәкірті Дулат Бүркітбай Алланың кәләмі Құран Кәрімді толықтай жаттап, қари атанды.

Жас қариды құттықтау жиыны өтіп, оған ұстаздар қауымы жиналды. 

Жиында Дулат Құранның соңғы аяттарын оқып, ҚМДБ-ның Жамбыл облысы бойынша бас имамы Бейбіт Мырзагелдиев батасын берді. Имам Құран жаттаудың артықшылығы жайында тілге тиек етіп, жаттап қана қоймай, оны сақтап жүрудің маңызын ерекше атап өтті. 

Ал аталған білім ордасының директоры Қанат Әділханұлы шәкіртке мақтау қағазын табыстап, игі тілегін жаудырды. 

«Құранның 30 парасын толық жаттап, қари атанған медресе-колледжіміздің студенті Бүркітбай Дулат Қанышұлы марапатталады. Алла тағала қалыбыңызды Құранға сай етіп, Өз құзырында ата-анаңызға алтыннан тәж кигізгей!» делінген мақтау қағазының мәтінінде. 

Айта кетейік, Д.Қанышұлы медресе-колледжде оқи жүріп, Құранды 1 жыл ішінде жаттап шықты. Алғашында ол Амангелді Бірлік және Әлмұхаммед Егізбаев ұстаздарымен Құранды меңгеруді қолға алған болатын. Карантин шаралары енгізіліп, оқу онлайн жүйеге көшкен уақытта Дулат өзі тұратын Шымкент қаласындағы «Айқап» мешітінің наиб имамы Ерасыл Халқыманмен бірге толық жаттап аяқтады.

Енді жас қари оқу орнындағы Амангелді Бірлік ұстазбен Құранды толық қайталап алып, алда хатымға өтуді жоспарлап отыр. Осындай батыл қадам жасап, білім жолын қуған жас жігітке облыс имамы қаржылай сыйлық табыстады.