Ислам ілімдерінің қоғамға қосар қызметіне тоқталған өкіл имам Б.Берденұлы: «Имам болу – үлкен жауапкершілік. Өйткені, имам – асыл дініміздің насихатшысы, ардақты пайғамбар (Алланың оған игілігі мен сәлемі болсын) сүннетінің мұрагері, ізбасары. Сондықтан, оның әрбір айтқан сөзі, басқан қадамы – соңынан ерген жамағаты үшін үлгі-өнеге. Ілімсіз амалдың кемел болмайтынын ескерсек, тал бесіктен көр бесікке дейін ілім іздеуден жалықпай, әрдайым ізденісте жүру – имамдарымыздың басты міндеті. Имамдарға арналған білім жетілдіру екі айлық курсын тиянақты қолға алудағы мақсатымызда – осы», – деді өз сөзінде.

Атырау аймағы бойынша имамдардың білім жетілдіру екі айлық курсында Бас имам Батыржан Берденұлы, наиб имам Артық Жұмабекұлы, «Әт-Тақуа» мешітінің бас имамы Өсімхан Аманбайұлы және Қанат Жұмағұл, Мейіржан Рахматулла сынды білікті дінтанушылар дәріс өткізбек.

Жыл сайын дәстүрлі түрде жалғасын табатын курсқа биыл да 30-дан астам ауыл, аудан, қала имамдары (шәкірт) қабылданды. Айта кетерлігі, медреседе білім жетілдіретін имамдар жатын орын, үш мезгіл тамақ және діни оқулықтармен тегін қамтамасыз етілген.

«Иманғали» орталық мешітінің

 баспасөз қызметі