Ардақты пайғамбарымыз (с.ғ.с.) хадистерінің бірінде: «Дін – насихат», – деген. Қоғамдағы қай кезеңді  алып қарасақ та, мұсылман қоғамында дін насихатына көңіл бөлінбеген кез болмаған.

«Уағыз айтылмаған ауыл қалмасымен» ұранымен ҚМДБ-ның Қызылорда облысы бойынша өкілдігі  орталық «Ақмешіт – Сырдария» мешітінің жанын құралған жергілікті ақпараттық-насихаттық топ өз жұмысын жалғастыруда.

Уағыз-насихат жұмыстары қала, аудан орталығы, ауданға қарасты барлық ауылдық округтерде өтуде. Аталмыш шараларға тұрғындар, жастар, мектеп оқушылары, мекеме қызметкерлері толық қамтылуда деуге негіз бар.

Кездесулердің негізгі мақсаты – Ислам дінінің құндылықтарын жете түсіндіріп, жат ағымдардан сақтануға шақыру. Осы бағыттағы бірнеше кездесулер облысымыздың Қармақшы, Қазалы, Арал аудандарында өткізілді.

6 күнде 60 кездесуді ұйымдастырған имамдар халықтың сұрақтарына жауап беріп, ұсыныстарын тыңдады. 

Қызылорда облыстық «Ақмешіт-Сырдария» мешітінің баспасөз қызметі