Астана қаласы әкімдігінің қолдауымен ұйымдастырылған алғашқы кездесу ҚМДБ-ның «Шариғат және пәтуа» бөлімі меңгерушісінің орынбасары Сансызбай Шоқанов, дінтанушы Бауыржан Отарбаевтың қатысуымен бірнеше мекемелерде өтті.

Түске дейін Астана қаласындағы Қылмыстық атқару жүйесі департаменті ЕЦ-166/10 мекемесінде діни қылмыс үшін бас бостандығынан айырылған 40-қа жуық азаматтармен кездесіп, теріс ағымдардың қауіп-қатерлігі мен қоғамға әкелер зияндығы туралы түсіндірме жұмыстары жүргізілді.

Сансызбай Шоқанов жазасын өтеушілерге басшыға бағыну, сабыр етудің артықшылығы, ертеңгі өмірді кекшілдікпен емес, жақсылыққа жоспарлау жайында тоқталып өтті. «Хадистерде айтылғандай, барша адам баласы қателеседі. Бірақ, сол қателік жасаушылардың жақсылары қателігін мойындап, тәубеге келгені екен. Қазақта жаңылмайтын жақ, сүрінбейтін тұяқ жоқ деген нақылмен ұғындырады. Кейде біліп, кейді білместікпен қателікке ұрынамыз. Адам баласы өз-өзіне ақылшы, тәрбиеші бола білсе, бұл әрекеттерді өткен күнмен қалдыруға болады. Бұл ретте сабырлылық таныту – ең маңыздысы. Сол себепті де, қай кезде, қандай жағдайда да ашуға емес, ақылға жүгінгеніміз абзал болмақ» деп С.Шоқанов.  Кездесу соңы бүгінгі күнде дін саласындағы өзекті сұрақтармен түйінделді.

Наиб мүфти Наурызбай қажы Тағанұлы өз сөзінде ел тыныштығы, ауызбіршілік жайында оңды насихаттарын жеткізді. «Ақиқатында, шынайы дін адам баласын рухани кемелдікке жеткізеді. Ал ислам ешуақытта зорлық-зомбылыққа шақырмайтын, кемеліне жеткен дін. Теріс пиғылды ағымдардың пайда болуы шын мәнінде, діни сауатсыздықтан басталады. Ислам әсіредіншілдікке емес, әрқашан орта тұсын ұстануға, қоғаммен бірге қалыптасуға, бейбіт қатынаста болуға үндейді. Құран Кәрімнің «Бақара» сүресінде Алла тағала «Шектен шықпаңдар. Алла шектен шығушыларды жақсы көрмейді» деп бізге айқын жол көрсетті. Кез келген нәрсені ақылға салып, байыппен шешу керек. Қазіргі әлемнің әр түкпірінде болып жатқан бүліктің басты себебі діни сауаттың олқылығынан екенін көреміз. Сауатты адам жаза баспайды. Мемлекет басшысы Н.Назарбаев өз сөзінде «Бүгінде, интернет пен жоғары технологиялар ғасырында, ақпараттар тасқындаған заманда, «сүзгі» адамның ішінде болу керек» деп, мұндай келеңсіздіктің алдын алу үшін ішкі иммунитетті қалыптастыру керектігін айтты. Біздің де айтарымыз, дін мәселесін осы салаға жауапты мекеме, тиісті уәкілетті орган бар, дін мамандары мен имамдардан сұрауларыңыз керек» деді наиб мүфти Н.Тағанұлы.

Кездесуде ҚМДБ «Шариғат және пәтуа» бөлімі меңгерушісінің орынбасары Сансызбай Шоқанов қой терісін жамылған ағымдардың астыртын қайда апарып соғатынын және онан сақ болудың жолдарын түсіндірді. Тыңдаушылардың да сауалдарына дін мамандары орынды жауаптар берді.

Қорыта айтсақ, бүгін РАНТ насихаты жалпы саны төрт жүзге жуық адамды діни маңызды мәліметтермен қамтыды. 

Зайырлы қоғамдағы дін жайы түсіндірілді