Бұл күндері республика аймағында және Қостанай облысы көлемінде «Ислам және зайырлы қоғам» тақырыбында іс-шаралар өтуде. Соның бірі облыстық «Марал ишан» және Қостанай қалалық мешіттерінің бастамасымен және Қостанай мемлекеттік педагогикалық институтында аталмыш тақырыпта кездесу өткізілді.

Кездесу барысында Қазақстан мұсылмандары діни басқармасының Қостанай облысындағы өкіл имамы Бахытбек Тәжімбет, қалалық мешіттің бас имамы  Шоқан Әмірханов, облыстық дін істер жөніндегі басқарманың бас маманы Нұрсұлтан Әбішев, институттың аға оқытушылары Айбек Панияз және Айгүл Амантаевалар сөз сөйлеп, күн тәртібіндегі мәселе бойынша өздерінің ойларын ортаға салды.

Шараның жалғасы Жітіқара аудандық «Ержан Тәтішев» мешіті мен аудан әкімдігінің ішкі саясат бөлімі ұйымдастырып «дөңгелек үстел» өткізді.

Оған аудандық мешіттің бас имамы Сабыржан Зейнелғабиденұлы, аудандық әкімдіктің ішкі саясат бөлімінің әдіскері, православ христиан шіркеуінің басшысы Игумен Максим және жоғарғы сынып оқушылары қатысты.

Сонымен қатар, Лисаков қалалық мешітінің ұжымы жергілікті «Қазақтелеком» және «Қазпошта» қызметкерлерімен «Ислам және зайырлы қоғам» тақырыбында кездесу өтті.

Бұл жиынға қалалық әкімдіктің ішкі саясат бөлімі, шаһардағы «Достық» гендерлік даму орталығы мамандары, мешіттің бас имамы қатысты.

Таран ауданының «Әйет» мешіті де аудандық ішкі саясат бөлімімен Тобыл орта мектебінде және Кәсіптік техникалық колледждерінде Қостанай облысы «Марал ишан» мешітінің найб имамы Мурзаканов Азаматтың және Қостанай облысы әкімдігінің Дін істер жөніндегі істер басқармасының маманы Абишев Нұрсұлтанның қатысуымен семинарлар өткізді.

Басқосуларда барлық қатысушылар өздерін толғандырып жүрген көкейтесті тақырыптарға нақты жауап алды. 

Осы шаралардың мақсаты – жастарды патриотизмге тәрбиелеу, дін мен зайырлы қоғамның үйлесімділігін арттыру, діни радикалды идеология және олардан келетін қауіп-қатермен қоғам болып күресудің әдіс-тәсілдерін үйрету, дінаралық татулық пен келісімді нығайту, жалпы адамзаттық рухани құндылықтарды насихаттау.

ҚМДБ Қостанай облысы бойынша өкілдігінің баспасөз қызметі