Ата сөзі — бата сөз - Қазақстан мұсылмандары Діни басқармасының ресми сайты

muftyat.kz

Қазақстан мұсылмандары Діни басқармасының ресми сайты

Update Required To play the media you will need to either update your browser to a recent version or update your Flash plugin.

Қазір 17:25:33

22 Сәуір 2026

5 Зулқағда 1447 Хижра

ДІНИ МЕРЕКЕЛЕР

Ата сөзі — бата сөз

24.03.2016

7258

0 пікір

– | A | +

Қазақ халқына бата құны жоғары киелі сөз. «Үйінде атасы бардың берер батасы бар» деген қазақ батаны қарт адамның ризалық сезімі, өсиетті ой тұжырымдары, жақсы тілегі деп біледі. Ал, батаны кімдер берген? Ежелден қадірлі қария, атақты батыр, дуалы ауыз билер, шашасына шаң жұқпайтын шешен, арқалы ақындар, ойшыл кемеңгерлер, қарт кісілер, көпті көрген абыз ақсақалдар, өз ісінің хас шебері, халық арасында жас болса да бас боларлық жолы мен жөні бар адам берген.

Сәулелі күніміз жарқырап, тоңымыз еріп, күн мен түніміз теңеліп, мерейлі Наурыз айы қарсаңында «Дін мен дәстүр» аясында Ақтөбе облыстық орталық «Нұр-ғасыр» мешіті «Ата сөзі – бата сөз» атты рухани іс – шараны өткізді. Игіліктің басын Бисмилләдан бастаған, батамен жалғаған, дәстүрмен үйлестірген, иманынан ажырамаған қазақ елінің ақсақалдары сахнаға шықты. Шараны арнайы алыс жолдан келген Астаналық ақын Арман Бердалин және Қарағандылық Айтбай Жұмағұлов басқарды. Айтбай ақын арнау айтты, Арман ақын өлеңдер жинағын оқыды. Бірінен бірі асып түскен баталар мәйегі жиналған қауымды ұйытты.

Қазақта «Жылу жинау» деген дәстүр бар. Екі жыл бойы жинаған қаражатына салған үйі бір күнде өртеніп, отбасымен біреудің сарайын паналап жүрген А.Ойлыбай азаматтың басындағы жағдайынан бейне дерек көрсетіліп, Ақтөбе мешіттері қаржылай әрі азық-түлік, киім-кешекпен жәрдем көрсетті.

Жарысқа төрелік еткен қос ақын қарт көңілдерді бөле жармастан, барлығына жылы лебіздерін білдіре отырып, алғыс хат пен сый-сыяпатты бөліп берді. Соңында халық тігінен тік тұрып, дуалы аталардың батасын қабыл алды.

Қарт көңілге сый

Қазіргі қоғамымыздағы қарттар үйі-жүректі жібітетін, ұйқыдағы мейірім мен адамгершілікті оятатын орын. Атауы қатал болғанымен, мұнда ата-әжелердің аялы алақаны мен ақ батасы бар. Бұл үй мұңды көздерге, сарғайған сағынышқа, ұқсас тағдырларға, өзекті өртер өкінішке толы.

ҚМДБ-ң Ақтөбе облысы бойынша жастар ісі жөніндегі өкілдігі әз Наурыз мерекесі қарсаңында Ақтөбе қаласында орналасқан «Қарттар» үйінде мерекелік іс-шара өткізді. Бұл үйде әрі мүгедектер де орын алған екен. Арнайы Наурыз мерекесіне бағытталған ізгі шараның негізгі мақсаты – кірбің шалған көңіл мен қайғы басқан жүздерге қуаныш сыйлау. Шара барысында ұлттық әндер орындалды, дәстүрлер көрсетілді, көркем сөзді жырлар оқылды. Қайырымдылық шарасы бойынша киім – кешектер таратылды.

Деніңе саулық Инабат!

«Ақтөбенің аялы алақаны» акциясы аясында қасиетті жұма күні ҚМДБ Ақтөбе облысы бойынша жастар ісі жөніндегі өкілдігі «Жүректен жүрекке» еріктілер тобымен бірігіп, Ақтөбе облыстық орталық «Нұр-ғасыр» мешіті алдында қайырымдылық жәрмеңкесін өткізді.

Жәрмеңке мақсаты өтініш білдірген Есбергенова Инабаттың ем-домына қажет қаражатқа ат салысу еді. Бұл игілікті істе жастар қолдарынан жасаған бұйымдарын, мұсылмандық заттарын сатылымға шығарды. Жәрмеңке сәтті өтіп, бар дайындаған бұйымдары өтіп, жинаған қаражатты толығымен Инабаттың анасына тапсырды. «Деніңе саулық тілейміз Инабат!» деген тілекте жастар көңілі дұғаға жалғасты.