ҚМДБ-ның Атырау облысы бойынша өкілі, «Иманғали» орталық мешітінің бас имамы Батыржан Мансұров «Қайырымдылыққа асығыңыз!» атты айлық акция өткізді. Бас имам көтерген бастамаға қала тұрғындары, мешіт жамағаттары, кәсіпкерлер түгелдей ат салысты. Бір айдың ішінде сегіз жүзден астам кісіден ерлер, әйелдер, балалардың қысқы-жазғы киімдері мен ойыншықтар жиналды. Сондай-ақ, күнделікті тұтынатын май, шай секілді азық-түлік өнімдерімен қайырымдылық акцияға үлес қосқандар бар.

Қасиетті жұма намазынан кейін «Иманғали» орталық мешітінің ауласында қайырымдылықтан түскен киім-кешектер, азық-түліктер, балалар киімдері мен ойыншықтар тағы басқа дүниелер көпшілік назарына ұсынылды. Мұқтаж жандармен кездескен бас имам Батыржан Берденұлы қайырымдылықтың дініміздегі алар орны жайында аят-хадистер айтып, бір-біріне көмек көрсетіп, мұқтажға жәрдемдесудің имандылықтан екенін жеткізді. Үлкен деңгейде өткізіліп жатқан қайырымдылыққа қолдау көрсетіп, қаржысымен, сөзімен, қолындағы барымен жәрдем берген жомарт азаматтарға, ағайындарға мешіт атынан алғыс айтып, оларға дұғада болу қажеттігін атады.

Қайырымдылық шарада өз қалауларымен азық-түлік, киім-кешектер, балаларына ойыншықтар алған мұқтаж кісілерде шек болмады. Мұндай ауқымды қайырымдылық шара жасап һәм үнемі осындай игі іске  мұрындық болып жүретін өңірдің бас имамы Б.Берденұлына және «Иманғали» орталық мешітінің ұжымына рахметтерін жаудырды.

ҚМДБ Атырау облысы «Иманғали» орталық мешітінің баспасөз қызметі