Жиынды ашып сөз сөйлеген комитет төрағасы Ғалым Шойкин алдымен еліміздегі және әлемдегі діни ахуал жөнінде әңгімеледі. «Біздің еліміз әу бастан терроризмге төзімсіздік танытып, онымен күресте белсенділік танытып келеді. Бұған Президент Нұрсұлтан Назарбаевтың халықаралық мінберлерде сөйлеген сөздері куә. Мәселен, Елбасы БҰҰ Бас ассамблеясының 70 жылдығына арналған сессияда осы тақырыпқа ойын ашық білдіріп, экстремизммен күресте бірігуге шақырған болатын.

Біз ­– зайырлы мемлекетпіз. Сондықтан біз көп дінділік пен көп конфессиялыққа шектеу қоя алмаймыз. Десе де, ел тұрғындарын радикалды ағымдардан сақтандыру – біздің міндетіміз. Осы бағыттағы мақсат-мұраттарымызды өзге діндердің мүддесіне қол сұқпай жүзеге асырып, дәстүрлі дінімізді насихаттай білгеніміз жөн» деді Ғалым Нұрмағамбетұлы.

Шара барысында Дін істері комитеті мен Бас редакторлар клубы және Еуразия арнасы арасында ынтымақтастық туралы Меморандумға қол қойылып, қатысушы журналистерге сертификат табысталды.

www.e-islam.kz