Рамазан айының келуімен он жетінші маусым күні «Иманғали» орталық мешітінде кешкі тарауих намазында қарилардың қатысуымен хатым басталған болатын. Атап айтқанда, Түркия елінің Діни басқармасы тарапынан мұнайлы өңірге келген қари Илхами Топал және жеті қырағаттан ижаза иесі (яғни, Құранды оқудың жеті жолын меңгерген), қари Еркінбек Шохаев жамағатқа хатым өткізді.

14-шілде күні аталған тарауих хатымы да аяқталды. ҚМДБ-ның Атырау облысы бойынша өкілі, "Иманғали" орталық мешітінің бас имамы Батыржан Берденұлы хатымның дұғасын жасап, халыққа ынтымақ, елге есендік және қасиетті айда жомарттық танытып, қайырымдылық көрсеткен жандарға береке тіледі.