Рамазан – Құран түскен, шапағат, мейірім, қанағат, сабырлық, тәрбие айы. Рамазан – жаннат есіктері ашық, тозақ есіктері жабық, ораза ұстайтын айы. Сондай-ақ, Рамазан қайырымдылық пен жанашарлық айы. Осыған орай, ҚМДБ-ның Талдықорған бойынша өкілі С. Ахмадиевтің тапсырмасымен Исламның бес парызының бірі болған зекет беру мәселесін насихаттау және жинауға арнайы топ құрылды. Топ Рамазан айының алғашқы күндері Панфилов, Алакөл және Сарқан аудандарындағы елді-мекендерде болып, ауқатты азаматтар мен шаруа қожалық жетекшілерімен кездесіп, «зекет тазару жолы, береке жаудыратын амал, байлықты көбейтетін бірде-бір жолы, Алланың разылығына жетелейтін ғибадат» екенін кеңінен түсіндіріп насихаттады.

Аудандардан бір шама зекет қоры жиналып, жергілікті мұқтаж жандарға зекет иелерінің атынан таратылды. Атап айтқанда, Сарқан ауданының имамы Асқар Серікбек және Талдықорған өңірі бойынша «Зекет» қорының өкілі Сарымолдаев Серіктің ұйытқы болуымен Сарқан аудандық мешітінде жағдайы төмен және көпбалалы 60 жанүяға 50 қап ұн және сойылған өгіз етінен үлестері таратылды.

Осындай ізгі істер Алланың берген абзал айында зекет берушілердің мүлігімен жалғаспақ.

Қасиеті мол айда мұсылман бауырларына қайырымдылық қол ұшын берген абзал азаматтарымызға Алланың нұры жауып, жанұяларына бақытты да берекелі өмір Алла Тағалам нәсіп етсін!

Талдықорған өңірлік

баспасөз қызметі