ҚМДБ-ның Атырау облысы бойынша өкілі, «Иманғали» орталық мешітінің бас имамы Батыржан Мансұров барша журналистер қауымына қасиетті Рамазан айының қадір-қасиеті жайында уағыз-насихат айтты. Сондай-ақ бас имам халықтың мұңын мұңдап, жоғын жоқтаумен қатар елінің әр жеткен жетістігін жарыса жариялайтын барша журналистер қауымын кәсіби төл мерекелерімен құттықтап, талаптарының өрге басып, төңіректеріне игі жақсылар жиналуына тілектестігін білдірді. «Иманғали» орталық мешітінің ұжымы атынан журналистерге сыйлық табыстады.

БАҚ өкілдері де өз кезегінде бірінен соң бірі сөз алып, ақжарма тілектерін жеткізді. Бас имам Батыржан Берденұлының игі істеріне куә екендіктерін айтып, әрдайым имандылық аясынан табылатындықтарын білдірді. Төл мерекеде елеп-ескеріп, журналистер қауымын ауызашар дастарханына шақырып, сый-сияпат көрсеткен мешіт ұжымына ризашылықтарын жеткізді.  

"Иманғали" орталық мешітінің

баспасөз қызметі