Игі іске үн қосып, сауапты істе жарысқан аналар қауымына ҚМДБ-ның Атырау облысы бойынша өкілі, «Иманғали» орталық мешітінің бас имамы Батыржан Мансұров алғысын білдіріп, Рамазан айының берекесі мен қадір-қасиеті жайында тұщымды уағызбен берекелі дастарханда бас қосқан жамағатты сусындатты. 

Ал, ақсақалды аталар жағы жастарға есті де ұлағатты сөздерін айтып, имандылық аясында ұйысуға әрі имамның қасынан табылуға шақырды. Сондай-ақ, кезек-кезек сөз тізгіндеген ақжаулықты аналарымыз биылғы рамазан дастарханының жылдағыдан өзгеше екенін атап, өңір имамы Батыржан Берденұлының тынымсыз еңбегіне дән ризашылықтарын білдірді.Ауызашар соңында елдің амандығы мен халқымыздың береке-бірлігі үшін дұға жасалды.

Иә, биылғы «Иманғали» орталық мешітінде жайылған рамазан дастарханы шынында жылдағыдан мүлдем өзгерек. Мешіт ауласына құрылған алты қанатты үш киіз үй 400-ден астам жамағатқа ауызашар қызметін көрсетуде. Аталған үш киіз үйдің өз атаулары да бар. Қазақы нақышпен әсемделген киіз үйдің біріншісі қарттар мен қадірлі қонақтарға, екіншісі әйелдер жамағатына, ал үшінші киіз үй жастар жамағатына қызмет көрсетіп келеді. 

«Иманғали» орталық мешітінің баспасөз қызметі