"Бізді мұсылмандар үшін қасиетті орын саналатын Мекке мен Мединеге жақын жерде орналасқан, яғни Йемендегі қақтығыстар алаңдатып отыр. Экстремистік топтардың жүргізіп жатқан әрекеттері түрлі дін өкілдерінің арасына от салып, Азия мен Африкадағы түрлі конфессиялардың арасына сызат түсіруде" деп атап өтті Нұрсұлтан Әбішұлы.

"Сонымен қатар, Украинадағы атыстар кезінде шіркеулердің зақымданғанын көріп отырмыз. Ал, "Ислам мемлекеті" тарабынан әлемге төніп отырған қауіп жаһандық деңгейге жетті. Дін атын жамылған лаңкестер Ирак пен Сириядағы мыңжылдық тарихы бар көне жәдігерлерді қиратып жатыр. Олар интернет арқылы өзге дін өкілдерінің, еріктілердің, журналистердің өлімінің жантүршігерлік бейнекадрларын таратуда" деді Мемлекет басшысы.

Оның айтуынша, дін бейбітшілікке, кешірімді болуға шақыруы тиіс. Ал, дін атын жамылған лаңкестік ұйымдардың әрекеті әшкереленіп, адамзат баласы оларға қарсы тұруы керек.