Семинарға қатысқан ҚМДБ-ның Атырау облысы бойынша өкілі, «Иманғали» орталық мешітінің бас имамы Батыржан Мансұров мектеп психологтарына «Мұсылманшылық көзқарас бойынша жан күйзелісі проблемаларын шешу жолдары» тақырыбында дәріс оқыды.

Аталған шарада Атырау облысы Дін істері басқармасының басшысы Еркінбек Шохаев оқушыларды күйзелістен сақтандырып, дұрыс бағыт-бағдар берудегі психолог мұғалімдердің жауапкершілігіне тоқталса, облыстық білім беру басқармасының бөлім басшысы Шамұрат Байжан қазіргі уақытта психолог мұғалімдерге ерекше көңіл бөліне бастағанын айта келе, алдағы уақытта психология пәні атауының Зайырлылық және дінтану негіздері болып өзгертілетінін жеткізді.

Шара барысында қалалық «Әт-Тақуа» мешітінің бас имамы Өсімхан Тілеуов «Күйзелістің алдын-алу және қазіргі заман оқушылары мен студенттерінің бойында күйзеліске қарсы тұру қасиеттерін қалыптастыру» жайында жан-жақты сөз қозғады. Ал теолог Айбек Аташев «Дәстүрлі отбасылық құндылықтар және тәрбие мәселесі» тақырыбында дәріс оқып, жан күйзелісінің пайда болу себептерін атап көрсетті.  Психолог мұғалімдер де өз пікірлерін ортаға салып, өзекті баяндама жасаған имамдар мен теолог-дінтанушыларға алғыстарын білдірді.

«Иманғали» орталық  мешітінің баспасөз қызметі