Өкіл имамның жетекшілігімен құрылған Тексеру комиссиясы қалыптасқан үрдіспен қала мешіттерін қысқы маусымға дайындығын тексеру жұмыстарын өткен аптада бастап кеткен еді. Кезекті кездесуде де қаланың байырғы орталығынан қоныс тепкен ғибадатхананың жай-күйі, жылу маусымына дайындығы комиссия мүшелерінің назарында болды.

Сондай-ақ, Наурызбай қажы Тағанұлы ҚМДБ тарапынан жүктелген тапсырмалардың орындалу барысына көз жүгіртіп, ой сарабынан өткізді. Мешіт жамағатымен, жұртшылықпен етене жақын араласып, бұқарамен бір болу керектігін баса айтқан бас имам уағыз-насихат жұмыстарының бірізділігіне, дін насихатын барынша көркем де кемел түрде жүргізуге ден қоюды тапсырды.

«Дін – аманаты ауыр міндет. Бас мүфтиіміз тапсырған жұмысқа әрбіріміз жауапкершілікпен қарауымыз керек. Мешіт табалдырығының тазалығынан, кітап сөресінің жинақылыған дейін ел назарында. Ал, халықпен тығыз қарым-қатынас жасау, көркем насихат жүргізу – біздің негізгі міндетіміз болуы керек. Бұқараның діни сауаттылығын арттыру да күн тәртібінен түспеуі тиіс» деген өкіл имам дін қызметкерлеріне бірқатар ескерту һәм ақыл-кеңесін айтып, нақты тапсырмалар бойынша қызмет етуге шақырды.