Дін мамандары бүгінгі таңда жастардың дінге ден қойғандығы көңіл қуантатынын жеткізді. Әлбетте, бұл – жақсылықтың нышаны. Дегенмен, теріс пиғылды ағымдардың жетегінде кетіп жатқан жастарымыз да жоқ емес. Осыған негіз болатын бірден-бір фактор ретінде бүгінгі ақпараттық кеңістікте діни мазмұндағы алуан түрлі сайттардың түрлі бағытта жұмыс істеуін, солардың кері әсерін айтуымызға болады.  Дін мәселелерінде жастар қолжетімді дүние – ғаламтор бетін ақтарып, бағыты бұлыңғыр сайттарға кіріп, таза сананы кірлетіп алады. Осылайша, ақ-қараны ажырату оңайға түспей, дәстүрлі діни танымға қарсы келіп жататын тұстары да аз емес.

ҚМДБ Жалпы және жастар ісі бөлімінің басшысы Алтынбек Ұтысханұлы студенттерді бүгінгі біліммен бәсекеге түскен ғасырда бағыты бұлыңғыр, танымы тұйық ағымдардан аулақ болуға шақырып, кез келген мәселеде Діни басқарма мамандарынан сұрап, білу керектігін айтты. Ал, елорданың бас имамы Наурызбай қажы Тағанұлы жастар ата дініміз бен баба дәстүріне егіз ұғымдай қарау керектігін жеткізді. «Дін – өте нәзік әрі күрделі. Кез келген ақпарат кеңістігіндегі дүниеге көзсіз елітіп, соңынан еруге болмайды. Мемлекетіміздің сан ғасырлар қалыптасқан дәстүрлі дінінен бөлек дүние іздеу – адасудың басы. Сол себепті арнайы дін мамандарына ғана құлақ түріп, ресми бекітілген сайттардан ғана дұрыс ақпаратқа қол жеткізуге болады» деді өкіл имам өз сөзінде.

Осы орайда ел тұтастығы мен халық  бірлігіне сызат түсірмеу үшін бірден бір дұрыс шешім – жастар арасында дәстүрлі дінді насихаттауға бағытталған бүгінгідей кездесулерді көбірек ұйымдастырып, жас буынмен қоян-қолтық араласып тұру. Ал осы тұрпаттағы шаралар әрбір жастың  діни таным-түйсігін арттырып, өмірге деген дұрыс көзқарасының қалыптасуына зор ықпал етеді.