ҚМДБ ОҚО бойынша өкіл имамы Бейбіт Мырзагелдиевтің тапсырмасымен А.Қаттани мешітінің ұйымдастыруымен Шымкент қаласында 200-ден аса бала сүндетке отырғызылды.

Іс-шара қайырымдылық акциясы негізінде өткізілді. Қайырымдылық шарасы биылғы жылы "Қожан ата", "Әл-Мүслим", және "Байғұт баба" мешіттерінде көрініс тапты.

«Бұл мешітте жылда 16-25 баланың шамасында сүндеттеледі. Бұл дәстүр тұрақты түрде жылда жалғасады. Мешіт жамағаты алдын ала жүргізілген хабарлама бойынша балаларын алып келеді. Бұл істі атқаратын арнайы маман дәрігеріміз бар», – дейді «Байғұт баба» мешітінің имамы Самат Сапарханұлы.

Сүндетке отырғызатын дәрігер Мұрат Сексенбаев бұл мамандықты Түркияда арнайы оқып, үйренгенін айтады.

Аталмыш мешітте балаларын «сұлулатқан» ата-аналар дән ризашылығын білдіруде.

«Өзім осы мешіттің намазханымын. Арнайы дәрігердің баламызды «сұлулап» бергеніне қуанып тұрмын», - дейді, мешіт жамағатының бірі Сапар Төреқұлов.

Шымкент қаласы А. Қаттани мешітінің
баспасөз қызметі