Еліміздің бірнеше облыс орталығында Қазақстан мұсылмандары діни басқармасының төл басылымдары «Иман» журналы мен «Мұнара» газетінің медиасеминары өтті.

ҚМДБ Төрағасы, Бас мүфти Наурызбай қажы Тағанұлының тапсырмасына сәйкес аталмыш газет-журнал қызметкерлері өңірлердегі дін қызметкерлерімен жүздесіп, басылымдарға қатысты ой-пікірлерін, ұсыныстарын тыңдады. Сондай-ақ әртүрлі тақырыпта имамдарға семинар өткізді.

Атап айтқанда, «Иман» журналының директор-бас редакторы Кеулімжай Құтты «Фактчекинг: Шынайы және жалған ақпарат», «Газет-журнал оқудың қажеттілігі» тақырыптарында, «Мұнара» газетінің директоры Ағабек Қонарбайұлы «Газет-журналдың насихат бағытындағы рөлі» тақырыбында, газеттің бас редакторы Серікбол Хасан «Медиадағы уағыздар» тақырыбында және журналдың жауапты хатшысы Ермұрат Назарұлы «Діни мақала жазуға жасанды интеллект құралдарын қолдану» тақырыбында құнды ақпараттар бөлісті.