Бүгін, қасиетті жұма күні Астана қаласындағы республикалық «Әзірет Сұлтан» мешітінде ҚМДБ төрағасы, Бас мүфти Серікбай қажы Ораз жұма уағызын жүргізіп, Бас мешіт жамағатымен жүздесті. Еліміздің барлық мешіттері үшін бекітілген кесте бойынша осы жұма уағызы «Тілдің кесапаты» тақырыбына арналған болатын.

Аталмыш тақырып бойынша ой өрбіткен Бас мүфти сөз қадірін сараптай білуге үндеп, әрбір айтылған сөздің батпандай ауыр салмағы мен зардабы болатыны жайлы көркем уағыз айтты. «Басқа пәле – тілден» деген қазақ даналығының түп-төркінін aрдақты пайғамбарымыздың (с.ғ.с.) сүннетімен сабақтастыра баяндаған Бас мүфти уағызы жамағат үшін тың ақпараттарға толы болды. Жақсы сөз айтудың абзалдығы мен жаман сөйлеудің кесапаты, өсек пен ғайбаттың кесірі секілді түйткілді тақырыптардың да түйіні тарқатылып, Бас мешіт жамағатына жан-жақты мағлұмат берілді. 

Он мыңдаған жан сап түзеген Бас мешіттегі жұма намазының имамдығына да Бас мүфти Серікбай қажы Ораз өзі шығып, қалың жамағатты қоңыр дауысына ұйытты. Намаз соңынан Бас мүфти Серікбай қажы Ораз еліміз бен жеріміздің тыныштығын тілеп, жамағатпен бірге дұға жасады.