Бүгін Алматы қаласындағы «Нұр-Мүбәрак» университетінде медресе-колледждер арасында олимпиада басталды. Осымен үшінші рет өтіп жатқан республикалық білім сайысының ашылу рәсіміне Бас мүфти Серікбай қажы Ораз қатысты. 

Айта кетейік, олимпиада келесі бағыттар бойынша өтеді:

1.«Фиқһ және ақида»;

2. «Құран және тәжуид»;

3. «Араб тілі».

Әр бағыт бойынша өткізілетін олимпиада 2 кезеңнен тұрады. II-турға бірінші кезеңде ең жоғары балл жинаған қатысушылар жіберіледі. Сөйтіп, II-турдың нәтижесі бойынша орындар белгіленеді. 3-курс пен 2-курс шәкірттерінің арасынан үш бағыт бойынша жеңімпаз болғандар өзара бас жүлде үшін бақ сынайтын болады. Бас жүлдені иемдену үшін әр курс бойынша жеңімпаз болғандар қатысқан бағытына қарамастан комиссия алқасы алдында жарыстың үш түрі бойынша сұрақтарға жауап беруі қажет. Сұрақтарға ең жақсы, толық жауап берген 3-курстың бір жеңімпазы мен 2-курстың бір жүлдегеріне комиссия алқасы бас жүлдені тағайындайды.

Республикалық олимпиадаға 54 ер бала, 18 қыз бала, жалпы саны 72 шәкірт қатысуда.